Trolleybusun iş prinsipi çoxlarına tanışdır: rezin təkərli bu texnika misdən hazırlanmış kontakt xəttindən cərəyan götürərək ümumi yolda hərəkət edir. İndi bu iş prinsipi bir qədər dəyişdirilərək elektromobillərə tətbiq edilir. 

Parisin cənubunda elektromobillərin batareyalarının avtomatik rejimdə doldurulması üçün xüsusi yol hazırlanıb. 1,5 kilometrlik yola görünməyəcək şəkildə mis sarğaclar düzülüb və şəhər elektrik şəbəkəsinə inteqrasiya olunub. Yolla hərəkət edən elektromobilin batareyaları öz-özünə dolur. Bir şərtlə ki, elektromobildə xüsusi reseptorlar quraşdırılmış olsun. Bu tip elektromobil sarğacların üstündən keçdikdə maqnit sahəsi yaranır və induksiya hesabına elektrik əmələ gəlir. 1 kilometr yol qət edən elektromobilin yığdığı enerji 3 kilometr hərəkətə imkan verir.