Honda 2050-ci ilə qədər süni intellekt (AI) texnologiyalarını avtomobillərinə inteqrasiya etməyi və onların köməyi ilə yollarda sıfır qəza və ölüm hallarına nail olmağı planlaşdırır. Bu barədə Yaponiya konserninin cümə günü, noyabrın 26-da dərc etdiyi süni intellekt texnologiyalarının inkişafı planında deyilir. Təklif olunan yeniliklərin mahiyyəti ondan ibarətdir ki, bütün lazımi kameralara və sensorlara malik olan Honda avtomobilləri davamlı olaraq sürücünün vəziyyətini və yolda mövcud vəziyyəti skan edir. Ağıllı sistemlər isə öz növbəsində sürücünü yolun hərəkət hissəsində və ya təhsil müəssisələrinə yaxınlaşan hər hansı maneənin yaranması, yol kənarındakı dayanacaqlar, piyada keçidləri və digər potensial təhlükəli ərazilər barədə xəbərdar etməli olacaq. Sürücünün təhlükələr barədə bir neçə üsulla xəbərdar edilməsi planlaşdırılır: vizual və səs siqnalları, sürücü oturacağının vibrasiyası, təhlükəsizlik kəmərinin bərkidilməsi, avtomatik sükan idarəetməsi və avtomatik əyləc, həmçinin qəza riskini azaltmağa kömək edən digər hərəkətlər.