Kia şirkəti Cənubi Koreyada K7, bizim bazarda isə Cadenza kimi tanınan sedanı yeniləmək qərarına gəlib. İstehsalçının dərc etdiyi tizerlər və videoçarxda sedanı ciddi dəyişikliklərin gözlədiyini görmək olar. Ön və arxa hissənin dizayn tərtibatı yenilənəcək, salonda isə tamamilə yeni ön panel peyda olacaqdır.

Cari nəsil Kia Cadenza modeli 2016-cı ildə keçirilmiş Nyu-York avtosalonunda debüt edib. Şimali Amerika bazarında KİA Cadenza modelinin əsas rəqibləri Toyota Avalon, Nissan Maxima və Buick LaCrosse avtomobilləridir. Cadenza ABŞ bazarında 290 at qüvvəli 3,3-litrlik altısilindirli benzin mühərriki və səkkiz pilləli avtomatik ötürmələr qutusu ilə təklif edilir.
Digər bazarlarda KIA Cadenza modelinin mühərrik qammasına 3,3-litrlik benzin mühərrikindən başqa, 2,2-litrlik dizel və 2,4-litlik benzin mühərrikləri də daxil edilib.

Avtomobil üçün təklif edilən avadanlıqlar siyahısına Apple CarPlay və Android Auto interfeysini dəstəkləyən multimedia sistemi, "ölü" zonalara nəzarət sistemi, adaptiv kruiz-kontrol və təcili əylənmə sistemi daxildir.

Bundan əlavə, Cadenza üçün 18 və 19 düymlük təkər diskləri də təklif edilir. Cənubi Koreyada KIA Cadenza 30,8 - 39,4 milyon vona (42,3 - 54,2 min manat) satılır.