El arasında “Badımcan” adlandırılan klassik London taksisi artıq yerini yeni taksomotora verməyə hazırlaşır.

Bu əfsanəvi avtomobillə vidalaşmaq üçün Kahn Design atelyesinin sahibi Afzal Kan London Taxi Company şirkətinin sifarişi ilə xüsusi “Last of Line” seriyasından olan taksi avtomobilini hazırlayıb.

Məlumdur ki, taksi avtomobilləri o qədər də dəbdəbəli interyerə malik deyildirlər. Bu avtomobillər utilitar xarakter daşıdığına görə, interyerin tərtibatında daha sadə və ucuz materiallardan istifadə edilir. Lakin, Kan tərəfindən hazırlanmış “Badımcanlar” bərədə bunu demək olmaz. 

Tünerlər TX4 modelinin interyer tərtibatında yüksək keyfiyyətli Nappa dərisindən istifadə ediblər. Üstəlik, tərtibatda xalq arasında “paxlava” adlanan rombşəkilli tikişlərdən də istifadə edilibdir. 

Bahalı dəri ilə nəinki sərnişin bölümü, hətta sürücü oturacağı, ön panel və sükan çarxı da üzlənibdir. Digər maraqlı bir element Rolls-Royce avtomobillərində gördüyümüz “ulduzlu səmanı” imitasiya edən tavandır.

Bu tavanın işıqlandırılması bir neçə variantda mümkündür.

Eksteryerə gəldikdə isə, bu seriyadan olan avtomobilləri beş müxtəlif rəngə boyamaq mümkündür. Bundan başqa, qara rəngli təkər disklərini, tündləşdirilmiş arxa şüşələri və xüsusi radiator barmaqlığını da qeyd etmək olar.

Kahn Design atelyesi beş ədəd “Last of Line” seriyasından olan taksomotoru buraxmağı planlaşdırır. Bu avtomobillərdən üçü artıq öz sahibini tapıb. Qalan iki avtomobilin sahibini isə şəxsən Afzal Kan özü seçəcəkdir.